- Me synest dette er veldig kjekt og givande å vera med på, seier Eva Thingbø, Anne Lise Malum og Andreas Solbakken (VG3). Dei er med å driva ungdomsklubben “Gnisten” i Sauda, og reiser over éin time kvar veg.
Håvard Brekkå er teamkoordinator for Lundenes-team. Han byrja i den nye delstillinga som teamkoordinator i haust. Oppgåvene er å setja saman team av ungdommar som kan reisa rundt til nye og eksisterande lag i område aust av Region Sørvest av NLM.
- Til saman er over 50 elevar er med på team-arbeidet, seier Brekkå.
Mangfaldig arbeid
Arbeidet ungdommane frå Lundeneset er med på, er variert. Medan nokre reiser til Sauda, er andre engasjert i barnelagsarbeid på Bjoa. Konfirmantarbeid på ulike stader er òg noko mange er med på. Snart vil det bli etablert ei besøksgruppe til fengselet i Sandeid.
Brekkå understrekar at det ikkje er nytt at elevar på Lundeneset er med på kristent arbeid i distriktet. Det nye er at opplegget er litt meir systematisk og heilskapleg, og at regionen har sagt at dei vil ha ei eiga delstilling til dette planleggingsarbeidet.
- Eg plar skildra dette arbeidet som ein vinn, vinn, vinn-situasjon, seier Brekkå, og utdjupar: - Bygdene får barne- og ungdomsarbeid, ungdommar får leiartrening og utfordringar og Lundeneset blir betre kjent og får truleg nye støttespelarar og søkjarar.
Treng bil
- Kvifor trur då responsen på Lundeneset har vore så stor?
- Eg trur mange vil vera med fordi dei ser at dei treng utfordringar. Dette er sunt for kristenlivet til tenåringar. Det er viktig at dei får trening i å ta ansvar, seier Håvard Brekkå.
- Ei anna viktig side ved dette, er at nokon i kvart team må ha førarkort på bil, og gjerne tilgang på bil. Det siste er gjerne den største utfordringa, seier Brekkå. Han deler denne utfordringa med lesarane: - Er det nokon som har ein bil i køyrbar god stand som dei kan gje som gåve til dette arbeidet? Då kan dei ta kontakt med meg her på Lundeneset, telefon 416 99 501, avsluttar Brekkå.
