- De må gjerne sjå på meg som ein bestefar, seier Asbjørn Kvalbein (66) når han innleier det første av fire møte om disippelskap på Lundeneset.
Til lvs.no seier han:
- Aldersskilnaden betyr ikkje så mykje når problemstillingane som blir tekne opp er relevante for dei unge.
Han er på Lundeneset for å ha kveldsbibelkurs for elevane, og møtesalen har vore fullsett fleire kveldar.
Kvalbein seier han legg vekt på å vera seg sjølv, og å leggja ut frå Bibelen vers for vers. Bibelkunnskap er mangelvare i samfunnet i dag, meiner han, og han har inntrykk av at dette er noko ungdom set pris på.
Han synest Lundeneset er privilegerte, som har mange kristne elevar.
- Det er veldig godt å vera her. Å ha med ungdom i vekst og modning å gjera, er både artige og utfordrande. Her er mange ulike mennesketypar, og eg har hatt fleire gode samtalar under opphaldet mitt på Lundeneset, seier Kvalbein.
Han fortel at ungdom i dag har mange spørsmål:
- Det er eit stort spekter i kva ungdom er opptekne av, men spørsmåla eg får kan i stor grad plasserast i fire kategoriar: Kristen i kvardagen, sex og samliv, bibelspørsmål, og spørsmål knytt til tru og tvil.
- Kva er viktig når ein kommuniserer med ungdom?
- Ein må heile tida ha i bakhovudet at dei unge har forskjellige bakgrunnar. Men eit viktig stikkord eg gir meg sjølv er nærleik. Då tenkjer eg på nærleik til Skrifta, til levd liv og til menneske.
