Ein heil torsdag var sett av til opplegg i regi av Folk og forsvar, ein organisasjon som driv informasjonsarbeid om norsk forsvars- og tryggingspolitikk. Det var elevar frå samfunnsfag i 2ME og politikk og menneskerettar i VG2/VG3 som deltok.
Dagen vart innleia med ei undervisningsøkt med ein representant frå Folk og forsvar. Deretter vart elevane delt inn i ulike, oppdikta nasjonar, og fekk prøva seg som statsministrar, utanriksministrar og forsvarsministrar i freds- og konfliktspelet.
I løpet av rollespelet får elevane blant anna kjennskap til korleis konfliktar oppstår, og korleis dei kan løysast.
- Elevane får òg prøvd ulike tryggingspolitiske verkemiddel og erfart korleis nasjonale og internasjonale organisasjonar kan bidra i konfliktførebygging og fredsbevaring. I tillegg lærer dei korleis tryggingspolitikk og den meir generelle utanrikspolitikken heng saman med nasjonal politikk og nasjonale omsyn, forklarer faglærer i politikk og menneskerettar, Dagfinn Våge.
