- I utgangspunktet var det russen som fekk spørsmål om å ha svoltramma i Pokot som tilleggsprosjekt. Men me fann ut at det er betre at heile skulen står samla om ei slik innsamling, og me utfordra elevrådet til å bli med, opplyser prosjektsjef i russen, Kristian Eiane.
Innsamlinga skjer gjennom Misjonssambandet, som nyleg har starta naudhjelpsarbeid i Pokot saman med Misjonssambandet på Island (SIK). Den totale ramma for arbeidet er 650.000 kroner.
- Elevrådet har bestemt at inntektene etter «Gi-en-dag» (Lundeneset sitt svar på «Operasjon Dagsverk») skal gå til dei som er ramma av svolt i Pokot, opplyser Maria Haug, ein av elevrådet sine ansvarlege for innsamlinga.
Maria legg til at dei òg vurderer andre måtar å få inn pengar på, til dømes tilby vask av bilar mot betaling. - Vi drøftar framleis gode innsamlingsmetodar, seier Maria.
Kristian seier at 3 000 personar manglar mat i Pokot, i det området Misjonssambandet har arbeid. Innsamlinga Lundeneset no har blitt ein del av, skal sikre desse personane mat kvar dag.
- Me har lova at me skal greia 50 000, kan hende klarer me meir, opplyser Kristian.
